فضيحة فى زراعة الشاطبى
فى البداية أحب أن أؤكد أننى فضلت ألا أضيف أى أضافة إلى هذا الموضوع وأن أنشره كما هو فأستمتعوا بذكريات من ملفات كليات الزراعة
الموضوع تم تسجيله بواسطة الطالبة "ليزا كمال" - ولهذا فإن العهدة على الراوى
خناقة دكاتره مع رئيس الجامعة
وكنا احنا الضحية
ليزا كمال: سقطنا بسبب لعب الدكاتره ورفعنا قضية على الكلية وكسبناها
ليزا كمال قالت:- إبتدت المشكلة سنة 2000-2001 فى كلية زراعة الشاطبى جامعة الأسكندرية لما اتخانقت دكاترة الكلية مع رئيس الجامعة وشتم رئيس الجامعة الدكاترة وقلهم انهم بهايم طبعاً الكلمة كانت جامدة جداً فقرر الدكاترة أنهم يسقطو دفعة سنة أولى علشان رئيس الجامعة يتشال فيها، ولكن طبعا رئيس الجامعة كان على اتصال بوزير التعليم العالى فقرر تغير نظام الكلية وأجبر الكلية أنها تأخد دفعة جديدة سنة أولى وطبعاً كدة بقى الكلية فيها دفعتين سنة أولى! واحدة لائحة قديمة والتانية لائحة جديدة بنظام جديد فقرر وكيل الكلية ومجلس الكلية إن دفعة اللائحة القديمة ملهمش أقسام ويدخلو كلهم شعبة عامة وأستند على إنة يقول إنهم ملهمش حق فى دخول الأقسام لانهم سقطوا السنة دى! وهى السنة اللى كانت اجبارى وسقطوها الطلبة بسبب لعب الدكاترة وطبعا رفعنا قضية على الكلية وكسبناها، لأن مش من حق الكلية أنها تجبرنا على كدة ولكن الكلية رفضت التنفيذ طبعا
بعض الدكاتره كان ردهم أن دى قرصة ودن لكم علشان تتنازلوا عن القضية
وكان معانا بنت دكتورة رفعت قضية معانا وكسبتها وهية الوحيدة الى نفذت القرار وطبعا باقى الدفعة (لا) ورفعنا قضية تانية وكسبناها بردو والكلية رفضت تنفذ القرار، لا والمهم أن الكلية علشان القضايا الى رفعناها حبت تعاقب الطلبة فكان ردها علينا أنها سقطت من الدفعة بتاعتنا الى عددها 250طالب سقطت منهم 100طالب و30 شيلتهم مدتين و20 شيلتهم مادة والباقى نجح نضيف وبإعتراف من الدكاترة نفسهم قالو أن دى قرصة ودن لينا علشان نتنازل عن القضية
ووكيل الكلية قال لنا اخبطو راسكوم فى الحيطة
بس للأسف اللى سقطو رفعو قضية تانى على الكلية والمهم كان المفروض أن لو قرار المحكمة أتنفذ إنهم يعملو لينا ترم صيفى علشان الترم الأول اللى ضاع مننا بس طبعا الكلية مش راضية اصل ياعينى الدكاترة عايزة تصيف ولسة احنا زى ماحنا دفعة سنة تالتة لائحة قديمة زى مبيقولو لسة شعبة عامة واحنا جيبين تقديرات كبيرة تدخلنا أحسن أقسام فى الكلية ومحدش بيسمع صوتنا خالص لا ووكيل الكلية لما طلعناله بقرار المحكمة كلمنا بطريقة وحشة جداً وقال لنا اخبطو راسكوم فى الحيطة ومكتفاش بكدة لا دة طردنا من مكتبة بطريقة مهينة جداً والمفروض أنة دكتور جامعى وأحنا طلبة جامعيين يعنى مش ناس من الشارع والمفروض إنة لينا حق عندة بس بقى تقول لمين وتكلم مين محدش بيسمعلنا خالص
بقلم الطالبة:- ليزا كمال
مدير تحرير الموقع:- الموضوعات والآراء المنشورة لا تعبر إلا عن رأي كاتبها
انا لحد دلوقتي بقالي زمن في الكليه والحمدالله علي كده والشكوي لغير الله مزله وحقنا عند ربنا واكيد اني ربنا هيجبلنا حقنا اكيد
شكراً لتعليقك على الموضوع وكنت أتمنى بما أنك فى الكلية أنك تكلمنا عن المشكلة دى لو كنت حضرتها أو سمعت عنها وشكراً لتشريفك لنا فى صوت زراعة